दुई गोलले पछि परेको अर्जेन्टिनाको अविश्वसनीय पुनरागमन, मेसी चम्किँदा क्वार्टरफाइनलमा प्रवेश
काठमाडौं । साविक विजेता अर्जेन्टिनाले दुई गोलले पछि परेको अवस्था उल्टाउँदै इजिप्टमाथि ३–२ को रोमाञ्चक जित निकाल्दै फिफा विश्वकप २०२६ को क्वार्टरफाइनलमा स्थान सुरक्षित गरेको छ।
अमेरिकाको एटलान्टा स्टेडियममा भएको खेलमा अर्जेन्टिना ७९औँ मिनेटसम्म २–० ले पछि परेको थियो। तर अन्तिम ११ मिनेटमा लगातार तीन गोल गर्दै टोलीले अविश्वसनीय पुनरागमन जित दर्ता गर्यो।
खेलको १५औँ मिनेटमा इजिप्टका यासर इब्राहिमले हेडमार्फत गोल गर्दै टोलीलाई अग्रता दिलाएका थिए। त्यसपछि ६७औँ मिनेटमा हाइसेम हसनको पासमा मोस्तफा जिकोले गोल थपेपछि इजिप्ट २–० ले अघि बढेको थियो।
तर अर्जेन्टिनाले हार मानेन। ७९औँ मिनेटमा कप्तान लियोनल मेसीको क्रसमा क्रिस्टियन रोमेरोले हेडरमार्फत गोल गर्दै अन्तर घटाए। त्यसको पाँच मिनेटपछि मेसी स्वयं गोल गर्दै खेल २–२ को बराबरीमा ल्याए।
दोस्रो हाफको इन्जुरी समयको दोस्रो मिनेटमा एन्जो फर्नान्डेजले विजयी गोल गर्दै अर्जेन्टिनालाई ३–२ को सनसनीपूर्ण जित दिलाए।
अब अर्जेन्टिनाले सेमिफाइनल प्रवेशका लागि कोलम्बिया र स्विट्जरल्यान्डबीचको विजेतासँग प्रतिस्पर्धा गर्नेछ। पराजित इजिप्ट भने प्रतियोगिताबाट बाहिरिएको छ।
यस विश्वकपमा इजिप्टले ९२ वर्षपछि पहिलो पटक समूह चरण पार गर्दै नकआउट चरणमा स्थान बनाएको थियो। टोलीले नकआउट चरणमा पहिलो जितसमेत हात पारेको इतिहास रचे पनि क्वार्टरफाइनल पुग्ने लक्ष्य भने पूरा गर्न सकेन।
यस खेलमा गोल गरेसँगै लियोनल मेसीले विश्वकपमा लगातार नौ खेलमा गोल गर्ने कीर्तिमान कायम गरेका छन्। उनी विश्वकप इतिहासमा सर्वाधिक ३१ खेल खेल्ने, सर्वाधिक २१ गोल गर्ने तथा सर्वाधिक ६ संस्करणको विश्वकप खेल्ने खेलाडीका रूपमा पनि स्थापित छन्।
यस्तै, मेसी विश्वकपको इतिहासमा लगातार छ वटा नकआउट खेलमा गोल गर्ने पहिलो खेलाडी बनेका छन्। उनले विश्वकपमा सर्वाधिक नौ असिस्ट गर्ने कीर्तिमान पनि आफ्नो नाममा लेखाएका छन्।
जारी विश्वकपमा आठ गोलसहित मेसी गोलकर्ताको सूचीमा शीर्ष स्थानमा छन्। यद्यपि, उनले यस संस्करणमा दोस्रो पटक पेनाल्टी चुकाएका छन्। यसअघि समूह चरणमा अष्ट्रियाविरुद्ध पेनाल्टी मिस गरेका मेसीले राउन्ड अफ १६ मा इजिप्टविरुद्ध पनि पेनाल्टीलाई गोलमा परिणत गर्न सकेनन्।