जेनजी आन्दोलनमा क्षति पुगेको लाइसेन्स छाप्ने मेसिन मर्मत गर्न २ करोडभन्दा बढी खर्च, विभागले विकल्प खोज्दै

काठमाडौं । भदौ २४ गतेको जेनजी आन्दोलनका क्रममा तोडफोडमा परेको स्मार्ट लाइसेन्स (सवारी चालक अनुमति पत्र) छाप्ने मेसिन मर्मत गर्न २ करोड रुपैयाँभन्दा बढी खर्चिने भएको छ। मर्मत खर्च उच्च भएपछि यातायात व्यवस्था विभागले मेसिन मर्मत नगरी विकल्प खोज्ने निर्णय गरेको छ।

इटालीको MatiCa कम्पनीबाट आयात गरिएको उक्त मेसिन सन् २०१९ मा करिब ६ करोड रुपैयाँमा खरिद गरिएको थियो। तीन वर्षे वारेन्टी सकिएको करिब एक वर्ष बितिसकेको छ ।

विभागका आईटी निर्देशक केशव खतिवडाका अनुसार मेसिनले १ करोड स्मार्ट लाइसेन्स छाप्ने क्षमतामध्ये ८५ लाखभन्दा बढी छापिसकेको छ। बाँकी करिब १५ लाख लाइसेन्सका लागि २ करोड मर्मत खर्च गर्नु परेपछि नयाँ मेसिन खरिद वा अन्य वैकल्पिक उपायमा जानुपर्ने निष्कर्षमा विभाग पुगेको हो।

वैकल्पिक उपाय खोजिँदै

खतिवडाले भने, “थप केही बजेट जोड्दा नयाँ मेसिन किन्न सकिने अवस्था छ। यसर्थ, मर्मत नगर्ने निर्णय गरेका छौँ।”
उनका अनुसार हालका विकल्पहरूमा:

नयाँ मेसिन खरिद

अन्य सरकारी निकायसँग जिटुजी (G2G) सहकार्यमार्फत छपाइ

प्रदेश सरकारहरूलाई नै लाइसेन्स छपाइको जिम्मा दिने प्रस्तावहरू छन्।

सुरक्षण मुद्रण केन्द्रसँग स्मार्ट कार्ड छपाइबारे पहिले नै सहमति भइसकेको पनि उनले जानकारी दिए।

लाइसेन्स छपाइ अवरुद्ध

विभागमा रहेको एक मात्र मेसिन क्षतिग्रस्त भएपछि हाल देशभर नयाँ लाइसेन्स छपाइ र ट्रायल प्रक्रिया रोकिएको छ।
मेचिनको दैनिक क्षमता ४,५०० कार्ड छाप्ने भए पनि मागअनुसार सेवा दिन नसकिएको स्थिति पहिले देखिनै रहेको थियो।
हाल करिब ३० लाख भन्दा बढी लाइसेन्स छपाइको पर्खाइमा छन्।

मुख्य तथ्यहरू:

मेसिन मर्मत खर्च: २ करोड+

मेसिन मूल्य (२०१९): ६ करोड

बाँकी छपाइ क्षमता: १५ लाख कार्ड

हाल बाँकी लाइसेन्स: ३० लाख+

विकल्प: नयाँ मेसिन, G2G छपाइ, प्रदेशलाई जिम्मा