६ नेपाली आरोहीको निधनप्रति एमालेको दुःख व्यक्त
काठमाडौं । पाकिस्तानस्थित ब्रोड पिक हिमालमा हिमपहिरोमा परी विख्यात पर्वतारोही निर्मल पुर्जा ‘निम्स दाइ’सहित ६ जना नेपाली आरोहीको निधन भएको घटनाप्रति नेकपा एमालेले गहिरो दुःख व्यक्त गरेको छ।
एमाले महासचिव शंकर पोखरेलले आइतबार जारी गरेको शोक वक्तव्यमा यस घटनाले पार्टी मात्र होइन, सम्पूर्ण राष्ट्रलाई स्तब्ध र मर्माहत बनाएको उल्लेख गरेका छन्।
वक्तव्यमा विश्व पर्वतारोहणको इतिहासमा नयाँ कीर्तिमान कायम गर्दै असम्भवलाई सम्भव बनाएका नेपाली आरोहीहरूले आफ्नो साहस, समर्पण र सङ्कल्पमार्फत विश्वभर नेपाललाई गौरवान्वित बनाएको स्मरण गरिएको छ।
‘संसारलाई साहस र सङ्कल्पको अनुपम पाठ सिकाउने हाम्रा सपूतहरू आज सधैँका लागि हिमालकै काखमा विलीन भएका छन्,’ वक्तव्यमा उल्लेख छ।
एमालेले उनीहरूको असामयिक निधनले पर्वतारोहण क्षेत्रसँगै समग्र राष्ट्रले आफ्ना अमूल्य राष्ट्रिय धरोहर र साहसी सन्ततिहरू गुमाएको जनाएको छ। साथै, यो घटना नेपालको पर्वतारोहण इतिहासमा एउटा स्वर्णिम अध्यायको दुःखद अन्त्य भएको पनि वक्तव्यमा उल्लेख गरिएको छ।
महासचिव पोखरेलले ६ महिना ६ दिनमै विश्वका ८ हजार मिटरभन्दा अग्ला १४ वटै हिमाल आरोहण गरेर नेपाल र नेपालीको गौरव विश्वमञ्चमा स्थापित गर्न उनीहरूले पुर्याएको योगदान ऐतिहासिक रहेको उल्लेख गर्दै राष्ट्रले उनीहरूको योगदान सधैँ उच्च सम्मानका साथ स्मरण गर्ने बताएका छन्।