निर्मला पन्त हत्या प्रकरणमा नयाँबाट अनुसन्धान सुरु गर्न गृहमन्त्री लेखकको निर्देशन
काठमाडौं, साउन १८ – गृहमन्त्री रमेश लेखकले कञ्चनपुरकी बालिका निर्मला पन्तको बलात्कारपछि हत्या भएको घटनाको गहिरो र नयाँ ढंगबाट अनुसन्धान सुरु गर्न प्रहरीको केन्द्रीय अनुसन्धान ब्युरो (सीआईवी) लाई निर्देशन दिएका छन्।
सीआईवी कार्यालय निरीक्षण गर्ने क्रममा गृहमन्त्री लेखकले उक्त घटनालाई सूक्ष्मरूपमा पुनः अनुसन्धान गरेर दोषीलाई कानुनी दायरामा ल्याउन आग्रह गरे।
“निर्मला पन्तको हत्या मात्र होइन, ब्युरोले अनुसन्धान गरिरहेका सबै जटिल घटनामा तीव्रता दिन आवश्यक छ,” गृहमन्त्री लेखकले भने, “नेपाल प्रहरीभित्र सीआईवी प्रतिको आम जनविश्वास बढ्दो छ, यसलाई कायम राख्दै जिम्मेवारीपूर्वक काम गर्नुपर्छ।”
सीआईवी लाई थप स्रोतसाधन दिने तयारी
गृहमन्त्री लेखकले सीमित स्रोतसाधनबीच पनि सीआईवीले उल्लेखनीय काम गरेको भन्दै मन्त्रालयले ब्युरोलाई प्रविधि, जनशक्ति र भौतिक स्रोतहरूमा अझ सशक्त बनाउने तयारी गरिरहेको जानकारी दिए।
उनले पछिल्ला दिनमा बढेका वित्तीय अपराध नियन्त्रणका लागि ‘वित्तीय अपराध अनुसन्धान महाशाखा’ गठन गरिएको बताए। साथै, चालु आर्थिक वर्षमा प्रहरी संगठनलाई थप सुविधा दिन विगतभन्दा बढी बजेट विनियोजन गरिएको उनले उल्लेख गरे।
प्रस्तुति र उपस्थिति
कार्यक्रममा वरिष्ठ प्रहरी उपरीक्षक होविन्द्र बोगटीले सीआईवीले हालसम्म गरेका अनुसन्धान, प्राप्त सफलता र भोगिरहेका चुनौतीहरूको बारेमा प्रस्तुति दिएका थिए।
उनले निर्मला पन्तको हत्या प्रकरणसहित अन्य घटनाहरूको अनुसन्धान पनि सक्रिय रूपमा भइरहेको जानकारी गराए।
कार्यक्रममा प्रहरी महानिरीक्षक दीपक थापा, सीआईवी प्रमुख प्रहरी अतिरिक्त महानिरीक्षक चन्द्रकुवेर खापुङलगायत वरिष्ठ अधिकारीहरूको उपस्थिति थियो।