नेपाललाई अतिकम विकसित मुलुकबाट स्तरोन्नति हुन थप तीन वर्षको समय
काठमाडौं । संयुक्त राष्ट्रसंघको महासभाले नेपाललाई अतिकम विकसित मुलुक (एलडीसी) को सूचीबाट स्तरोन्नति गर्ने प्रक्रियाका लागि आवश्यक तयारी अवधि थप तीन वर्ष बढाएको छ। नेपाल र बंगलादेशका लागि सन् २०२९ नोभेम्बर २४ सम्म तयारी अवधि थप गर्ने प्रस्ताव महासभाले सर्वसम्मतिले पारित गरेको हो।
न्युयोर्कस्थित संयुक्त राष्ट्रसंघको मुख्यालयमा बसेको ८१औँ महासभाको बैठकले प्रस्ताव नम्बर ८१/एल.८ सर्वसम्मतिले पारित गर्दै दुवै देशको स्तरोन्नतिका लागि निर्धारित तयारी अवधि थप गर्ने निर्णय गरेको न्युयोर्कस्थित संयुक्त राष्ट्रसंघका लागि नेपालको स्थायी नियोगले जनाएको छ।
यो निर्णयसँगै नेपालले अतिकम विकसित मुलुकको सूचीबाट स्तरोन्नति हुनुअघि आवश्यक संरचनात्मक तथा संस्थागत सुधारका लागि थप समय पाएको छ।
नेपालले प्राप्त अतिरिक्त समयलाई उत्पादन क्षमता अभिवृद्धि, संस्थागत सुदृढीकरण तथा आर्थिक र सामाजिक रूपान्तरणका लागि उपयोग गर्ने जनाएको छ।
त्यसैगरी, स्तरोन्नतिपछिको सहज संक्रमण सुनिश्चित गर्न तयार पारिएको सहज संक्रमण रणनीति (स्मुथ ट्रान्जिसन स्ट्राटेजी), दिगो विकासका लागि सन् २०३० को कार्यसूची र दोहा कार्ययोजनाको प्रभावकारी कार्यान्वयनमा जोड दिने जनाएको छ।
थप गरिएको अवधिले नेपाललाई अतिकम विकसित मुलुकको सूचीबाट सहज, दिगो र अपरिवर्तनीय रूपमा स्तरोन्नति हुने लक्ष्य हासिल गर्न सहयोग पुग्ने विश्वास गरिएको छ।
यस निर्णयका लागि नेपालको स्थायी नियोगले संयुक्त राष्ट्रसंघका सबै सदस्य राष्ट्रप्रति निरन्तरको सहयोग, ऐक्यबद्धता र समर्थनका लागि धन्यवाद व्यक्त गरेको छ।