बाबुबाट असहयोग पाएका सन्तानका लागि आमाको नामबाट नागरिकता : गृहमन्त्री लेखक

काठमाडौं । गृहमन्त्री रमेश लेखकले बाबुको सहयोगबिना नागरिकता नपाएका सन्तानका लागि आमाको नामबाट नागरिकता प्रदान गर्ने व्यवस्था सहितको विधेयक ल्याउन लागिएको जानकारी दिएका छन् ।

शुक्रबार राष्ट्रिय सभाको बैठकमा बोल्दै मन्त्री लेखकले नागरिकता नहुनु अत्यन्त पीडादायी अवस्था भएको उल्लेख गर्दै त्यस्ता समस्यामा परेका सन्तानलाई सम्बोधन गर्न विधेयक संशोधन गर्न लागिएको स्पष्ट पारे।

उनले भने, “जुन बाबुहरू आफ्ना सन्तानलाई न त संरक्षण दिन्छन्, न त माया–स्नेह। शारीरिक रूपमा बाबु भए पनि व्यवहारले बाबुको भूमिका निर्वाह नगर्ने बाबुहरूबाट पीडित सन्तानको हकमा आमाको नामबाट नागरिकता दिने व्यवस्था गरिनेछ।”

लेखकले हालको संवैधानिक व्यवस्था अनुसार आमा र बाबु दुवै नेपाली नागरिक भएमा मात्र सन्तानले वंशजको नागरिकता पाउने, र यदि आमाले नेपाली नागरिकता नभएको खण्डमा सन्तानलाई अंगीकृत नागरिकता दिने प्रावधान रहेको स्मरण गराए।

“यदि संविधानमा व्यवस्था नै परिवर्तन हुने गरी ऐन बनायौं भने त्यसको कार्यान्वयन सम्भव हुँदैन,” मन्त्री लेखकले भने।
विधेयकमा के के छन् ?

बाबुको साथ नपाएका सन्तानले आमाको नामबाट नागरिकता पाउने व्यवस्था

आमाले नागरिकता दिन असहयोग गरेमा भविष्यमा बाबुको नामबाट मात्रै नागरिकता दिने व्यवस्था सम्भव हुने उल्लेख

राष्ट्रियता नहुनु पीडादायी भएकाले यस्तो समस्या अन्त्य गर्न कानुनी सुधार आवश्यक

गृहमन्त्री लेखकमार्फत आएको प्रस्तावले बाबुबाट त्यागिएका वा असहयोगमा परेका सन्तानलाई राज्यले चिन्दै नागरिकताको अधिकार सुनिश्चित गर्न खोजिएको संकेत गर्छ। संविधानको सीमाभित्र रहेर नै समाधान खोज्ने सरकारको प्रयास रहेको उनले स्पष्ट पारे।